FUNES (USP). L mancia mo puech plu de n ann ai juesc olimpics da d’inviern de Milan-Cortina 2026 y chisc dis ie pià via l proiet “Olimpiade tla scoles” metù a jì dala sezion sudtiroleja dl comitat olimpic naziunel talian (CONI) adum cun la ntendënzes scolastiches tudësces, talianes y ladines. L fin ie chël de purté i juesc olimpics plu daujin ai sculeies tres l’ancuntedes cun la campiunësses y i campions che à vivù chël che tl sport ie l traviert plu dejidrà.
Ti ultimi dis iel stat inaugurà chesc proiet adum cun la ex biatleta Karin Oberhofer, che à vijità la scola elementera de Santa Madalena te Funes, ancuntan i sculeies dla terza, quarta y quinta elementera.
L’ex campionëssa sudtiroleja à cuntà ngrum de ntraunides de si longia cariera, cun la vënta dla medaia de bront tla stefeta mista ai juesc olimpics de Sochi dl 2014 coche mumënt de majra mpurtanza. Adum cun Oberhofer fova nce l president dl Coni Südtirol Alex Tabarelli y l’ambolt de Funes, Peter Pernthaler.
“Ulon purté l sport daujin ai jëuni y ala jëunes y ntujiasmé i sculeis cun la stories y senificac che i juesc olimpics y paraolimpics posa trasmëter a ëi. L ie mpurtant comuniché coche nasc l pensier olimpich: ancunté persones da dut l mond y zidlé i raporc cun respet, toleranza y stima” à sotrisà l president dl Coni Südtirol Alex Tabarelli. “L ie da stramp mpurtant istrui la jëunes y i jëuni al spirit dl amezizia, dla solidarietà y dl fair play, senza discriminazion de degun viers. Da chësc nasc ënghe i trei macro valores olimpics: ezelënza, respet y amezizia”, stluj ju Tabarelli.
L proiet juesc olimipics tla scoles: 70 ancuntedes tl 2025
L proiet juesc olimpics tla scoles jirà inant nchina ala fin dl ann y trajerà ite de ndut 70 scoles sudtirolejes. L ie la maniera ideela per ji inant la streda de viers di juesc olimpics da d’inviern Milan Cortina, che sarà inaugurei ai 6 de fauré dl 2026. Nce Südtirol sarà na pert mpurtanta di juesc, de gra ala organisazion dla garejedes de biathlon, sun l program dai 8 ai 21 de fauré 226 tl stadio a Antholz. I juesc paralimipics scumencerà ufizialmënter ai 6 de merz 2026.
