Budget y cosć
Sun chësta plata saral da udëi l budget, i nvestimënc y i cosć te na maniera trasparenta.
La fondazion Milano Cortina à a disposizion n budget total de zirca 1,6 miliarc de euro per l’urganisazion di juesc olimpics y paralimpics da inviern dl 2026, de chisc rua zirca 400 milions de euro dal Comitat Olimpich nternaziunel (CIO) tres l Broadcast Refund Agreement.
Ndependënt da chësc, uniral nvëstì na soma de 3,4 miliarc de euro per i juesc olimpics y paralimpics da inviern, per 94 ntervënc de renuveda y modernizazion de nfrastrutures y frabicac (de chisc 44 relativs ala strutures sportives y 50 ala nfrastrutures de transport). Chësta nfrastrutures sarà realisedes dantaldut dala SIMiCo2026, na azienda de nfrastrutures giaurida aposta per chësc. Si plan per la opres ie stat dat pro dal decret dl Presidënt dl Cunsëi di Ministri ai 8 de setëmber 2023 (https://www.simico.it/piano-delle-opere/). La opres che reverda la nfrastrutures de trasport te Südtirol ie de cumpetënza dl departimënt de mubiltà dla pruvinzia autonoma de Bulsan (https://www.provincia.bz.it/turismo-mobilita/strade/costruzione/isarco-pusteria-badia.asp).
Ënghe la Pruvinzia autonoma de Bulsan tol pert ai cosć y nvestimënc per i juesc olimpics da inviern 2026 a Antholz, la majra pert cun n gran sustëni dl Stat, destinan finanziamënc ala nfrastrutures. Aldò di dati dl mumënt, nvestësc la Pruvinzia zirca 171 milions de euro per nfrastrutures, ntan che l Stat finanzieia zirca 460 milions de euro per la nfrastrutures te Südtirol. Danter chisc, rua ite i proiec per la nfrastrutures de trasport, per chëi met la Pruvinzia a disposizion 143,82 milions de euro y l Stat 91,33 milions de euro. Te chësta zifres ie laite ënghe la opres per la strutura sportiva de Antholz, cun n nvestimënt total de 58,5 milions de euro spartì su tra Pruvinzia y Stat. Per la restruturazion dla Cësa de Cultura de Antholz, met l Stat a disposizion 3 milions de euro, ntan che la Pruvinzia mët 1,5 milions de euro.
L gran proiet de mobiltà dla variante dla “Riggertalerschleife” sun la linia dla ferata de Puster, che sustën l spustamënt dl trafic dala streda al scienes, vën finanzià defin dal Stat cun n custimënt de 250 milions de euro, nia tres finanziamënc olimpics, ma tres la resorses dl PNRR. Sëuraprò, propri de gra ai juesc olimpics, iel stat mesun realisé doi proiec mpurtanc per la segurëza dl provijonamënt dl strom metan sota tiera ite la linies de auta tenscion tla valeda de Puster, ulache la firma Terna met a disposizion coche nvestimënt 90 milions de euro.
Te chësta sezion dl sito ulons mëter a disposizion na panoramica rëidla dla singula spëises y nvestimënc.
La basa giuridica, da una na pert per l’autorisazion a fé pea y dal’autra per la spëises y i cosć che reverda i juesc olimpics, ie la lege pruvinziela n. 11 dl 12 de nuvëmber 2019, particularmënter i articui 1 y 1-ter.
Tla prejentazion di ponc fajon na desfrënzia tra nvestimënc y cosć. I nvestimënc reverda la nfrastrutures y la opres de edilizia, ntan che i cosć reverda i custimënc operatifs coche manifestazions, servijes de trasport y autra scumënciadives.
Te n valgun caji y per valguna spëises iel mo nia mesun avëi l priesc. La posizions sarà da udëi permò canche l unirà tëut la dezijions formeles y la spëises sarà stlarides.