I juesc te Südtirol
I juesc olimpics da inviern 2026 tla Talia porta pro a arjonjer n nuef standard, davia che i ne sarà nia da udëi te un n post, ma i se basa sun na urganisazion dezentraliseda. Mpede frabiché nueva strutures sportives, vëniel adurvà mplanc ejistënc y che funziunea bën. Ora de chël, ie l ubietif chël de garantì che la strutures vën nuzedes inant per plu tëmp y te na maniera sustenibla do i juesc olimpics.
N auter aspet mpurtant ie la partezipazion di urganisadëures dl post cun si cumpetënzes y esperienza per mëter a jì al miec la manifestazion. Chësta la rejons ciuldi che Südtirol à pudù to pert a chisc juesc olimpics. Cun si mplanc sportivs che funzionea scialdi bën, l’esperienza coche urganisadëures de garejedes a aut livel y la tradizion ti sporc da d’inviern, porta Südtirol pro al suzes de Milan Cortina 2026.
N ejëmpl per l sfrutamënt de mplanc ejistënc ie l stadio de Biathlon de Antholz, la ”Olympic Arena Alto Adige Südtirol“, che da belau 50 ani ie l luech per garejedes de Copa dl mond y campionac dl mond. Ora de chësc à duta la valeda de Antholz na cultura y tradizion dl biathlon da ngrum de ani.
Dut Südtirol ie n raion apasciunà de sport, tlo ie nasciui ben 60 atlec y atletes che à davanià na medaia olimpica. Chisc suzesc nasc da na strutura sterscia de nosta lies sportives, che sustën i talënc jëuni. De gra à la cuantità de lies sportives te Südtirol, à i jëuni y la jëunes la puscibltà de crëscer y arjonjer l suzes nternaziunel te ngrum de disciplines sportives.
La mpurtanza dl susteni ai talënc jëuni vëijen dantaldut canche i juesc olimpics ie daujin, canche atletes y atlec cun na bona furmazion sportiva ie fundamentei. La Copa dl Mond de biathlon te Antholz, che ie aldidancuei una dla majra manifestazions sportives dla Talia, ie scialdi mpurtanta nia me per i atlec prufesciunisć ma nce per i jëuni y la jëunes che vën do, ei possa viver na esperienza unica y tò da ejëmpl i mieur atlec y atletes dl mond.
