I cater dis dedichei ala Copa dl Mond de biathlon ie finei via cun n bilanz plu che positiv cun plu de 55.000 spetadëures tla “Südtirol Arena” a n ann dai juesc olimpics de Milan Cortina 2026.
RASEN-ANTHOLZ (USP). I numeri rejona da sëui: 56.600 spetadëures, 230 giornalisć y reprejentanc di media y sambën ëi: plu de 1000 ulenteresc che à inò judà pea a realisé n event straordiner tl ncësa dl biathlon sudtirolej. A n ann dai juesc olimpics da d’inviern de Milan Cortina 2026, stluj Antholz ju cun n bilanz scialdi positiv la tapa tradiziunela de Copa dl mond de biathlon.
L’edizon 2025 ova n valor particuler, davia che la fova la proa generela dl apuntamënt olimpich. Per l’ucajion, se à la Südtirol Arena Alto Adige mustrà cun si nuev guant, do i ntervënc de restyling che ie stac fai ti ultimi mënsc. N pasaje fundamentel per l’edizion storica di juesc olimpics, ulache dut l mond dl biathlon cialerà a Antholz.
L’ultimo di de garejedes, cun la stafeta dl’ëiles y la garejeda de sauté do di ëi, ie ruedes a Antholz ngrum de autoriteies, danter l’auter ënghe l president dla pruvinzia Arno Kompatscher y l’assessëur pruvinziel al sport Peter Brunner. Tramedoi à laudà la miuries fates al zënter de biathlon de Antholz. “Son stac boni de mëter a ji n mplant de ezelënza a livel nternaziunel, che ie n proiet modern y sustenibl y che garantësc a Antholz y a duc i apasciunei de chësta disciplina de nuzé la nfrastrutura ënghe do i juesc olimpics, per duta la generazions dl daunì”, à spiegà Kompatscher.
N mplant renuvà
Per se anjenië ai juesc olimpics dl 2026 ie l stadio de Antholz unì adatà y mudernisà. I ntervënc reverda n valguna pertes dl nfrastrutura che i milesc de spetadëures à bel pudù udëi ntan chisc dis de test event: la nueva trassa pasa tl stadio do l poligon, l ie stai metui a ji nuev panel screen per pudëi cialé mo miec dal vif y resultac al poligon. Ntan chisc dis de garejedes ie ënghe l nuef mplant de iluminazion stat inaugurà. Sëura l zënter media renuva, ulache 300 giornalisć avrà post ntan i juesc olimpics, ie states giaurides la nueva postazions per la stampa. Ntan chisc dis de garejeda ie stat testà l servij de trasport per i milesc de spetadëures y ulenteresc tl stadio y ino de reviers.
Antholz à pasà cun la mieura notes chësc ejam pre-olimpic, te n ann l sëmi olimpich deventerà realtà.
tl
